Колку е моќна коледарската вреќичка и бадниковата трпеза

Еден од најубавите обичаи во нашата православна традиција е коледарењето. Рано наутро, детскиот глас и коледарските песни го најавуваат Христовото раѓање, а за возврат, домаќинките ги полнат нивните торбички со дарови од природата.Но, дали сте знаеле дека таа коледарска торбичка не е само симбол на вербата, туку и вистинска ризница на здравјето? Како нутриционист, ви откривам што сè се крие во овие скромни, а моќни плодови.

Јаткасти плодови: Чувари на срцето

Ореви, лешници, бадеми, фстаци-овие плодови се богати со есенцијални масни киселини кои:

Го намалуваат ризикот од срцеви заболувања и атеросклероза.

Го намалуваат лошиот (LDL) холестерол.

Ја стимулираат мозочната активност и даваат долготрајна енергија.

Содржат ситостерол и аминокиселината триптофан, клучни за добар сон и расположение.

Свежо овошје: Витаминска бомба

Јаболка, портокали, мандарини, киви

Покрај изобилството на витамини (Ц, А, Е), тие се совршени за одржување на линијата:

Ниска калорична вредност: Идеални за регулирање на тежината.

Растителни влакна: Делуваат лаксативно, ги исфрлаат токсините и го намалуваат целулитот.

Имунитет: Витаминот Ц ја зголемува отпорноста на вируси и бактерии, додека калциумот и калиумот го одржуваат ритамот на срцето.

Суво овошје: Природен лек

Урми, смокви, суво грозје-лесно сварливи плодови кои ја прочистуваат крвта:

Суво грозје: Помага при исцрпеност и го подобрува либидото.

Урми: „Бомба“ од природни шеќери (глукоза и фруктоза). Натопени во вода преку ноќ, тие се одличен лек за зајакнување на срцето и помош при мамурлак.

Трпезата за Бадник е супер-храна на едно место

Обичајот налага посна и богата трпеза (грав, сарма, риба, тиква), која нуди неверојатни придобивки:

Гравот : Исклучителен извор на протеини и растителни влакна. Не содржи холестерол, го регулира шеќерот во крвта и штити од рак на дебелото црево. Поради фолната киселина, е одличен за трудници.

Рибата: Извор на Омега-3 масни киселини. Го штити кардиоваскуларниот систем, ги зајакнува коските и го забавува стареењето.

Тиквата: Меѓу зеленчукот, таа е кралица на железото и калиумот.

За црн дроб: Се препорачува конзумација на свежа тиква.

За желудник: Варена тиква или сок од тиква помагаат кај чиреви и гастритис.

Диуретик: Најдобриот природен начин за исфрлање на вишокот течности.

Моќта на коледарската торбичка и бадниковата вечера е симбол на моќта на здравјето. Нека оваа традиција биде ваш поттик за здрава исхрана која ќе ви стане животен стил.

Ви посакувам убави Божикни празници, исполнети со љубов, хармонија и верба!